Mbunge ya kaunty ya Embu nivitukitikie budget ya mwigana wa billion 6.8 iria igutumika thiini wa miradi ya uthiyi wanambere na mautungata thiini wa thirikari ya kaunty ino mwaka wa mbeca wa 2021/ 2022.
Mwenegiti wa kamiti ya kuvanga utumiri wa mbeca Harrisson Mwaluko nike uretire ndereti ya kwaririra kuvanga budget varia augite mbunge ino niroretie indo iria itari ndivire na matenga mbeca cia kuriva thiiri.
Mwaluko uria ni MCA wa wardi ya Mwea augite ruvonge rwa ugima wa mwiri niruo rutengeretwe kigina kinene kia mwigana wa billion 1.7 mbecari ino , Thivitari ya Embu level 5 itengeretwe million 123 , na cio million 162 niitumika kurikia gutuma dispensary na indo iria iravatarika kuo.
Naguo mwigana wa million 452 utengeretwe kwandika arimu a ECDE .
Gwikira rami na kumenyerera varavara cia kaunty gutengeretwe billion 1.3 rungu rwa ruvonge rwa waki wa varavara , uruti wira wa mwingi na energy .
Urimi, na urithia wa indo cia nthakame utengeretwe million magana 421 .
Million 362 niitumika kurikiriria kiganda gia kuthodeka uki na store ya kwiga maketha Kithimu.
Ruvongeri rwa kithomo science na technology ngiri 117 ikavecanwa kuri arutwa aria maravatara utethio muno na njira ya bursary.
Munini wa spika Steve Simba wa Runyenjes Central augite miradi iria iravutia mwingi niyo ivetwe mbeca, varia augite miradi iria ikoretwe igitethia tu aria maravewa kandarathi atheri nirungamitue.
Thiini wa budget ino million 40 itengetwe gutumika thiini wa mitaratara ya ugaruruku wa riera.
Kunari uguo atongoria aya nimamurikite ruvonge rwa wongania goti kauntiri ya Embu kugaciria wongania wa goti niguo gutigirira kwina mbeca mbiganu niguo kwithema na marivi matakinyaniritue .
Wanja wa Njiru
