Akenya matanyivirite 12 matukaniritwe vururiri wa Afghanistan, athatu tu makirutwa vururiri ucio, uria ukoretwa na wagagu mwingi vuva wa utongoria wa America kuruta maavithaa ao aria maratethagiriria kureta thayu kuoo vari miaka 20, ino ni kuringana na ruvonge rwa maundu ma nja ya vururi.
Thiini wa ndumiriri iria ivecanitwe umunthi tariki 19, ruvonge ruru ruugite akenya athatu tu nimo mavotete kuuma vururiri uyu uri na ugwati. Umwe wao arakinyire guku vururiri muthenya wa igoro namo acio engi airi marevokwa gukinya guku vururiri umunthi kivwai.
Wavo nimaugite nimaandikirite ciungano iria akenya acio engi mararutira wira niguo gutigirira nimamavangira uria magucoka guku vururiri.
Kiambiriria gia kiumia giki, mwandiki mukaru wa maundu ma nja ya vururi Macharia Kamau niwaugire akenya aria mararuta wira Afghanistan magacokua guku ni aria mamandike.
Ino yukite wa riria wagagu uthiite nambere kwonekana vururiri ucio varia Taliban marigiciria tauni nene nagutonya nginya thingirari wa iregi mwena ucio. Rais wa vururi ucio Ashraf Ghani niuririte kwingi undu uria augite ni kwa ararigiriria gwitururwa kwa nthakame.
Mbica irutitwe online
-Mbuya Ngari-
