Kiama kia mangavana nigicenjetie muthenya wa mucemanio wa mugwanja na wa muthia mwakari uyu uria urari wikike kauntiri ya Makueni tariki 23 nginya tariki 26 mweri uyu wa kanana.
Mwene giti wa kiama kiu nike Martin Nyaga Wambora augite gitumi kia gucenjia mucemanio ucio niundu wa gukanjwa kwa micemanio ya mwingi ni Rais Uhuru Kenyatta na akiongera nimakamenyithania mithenya iria micemanio iyo ikavangwa.
Thiini wa ndumiriri yake kuri nyomba cia movoro, Rais Uhuru Kenyatta augite rivoti nicionanitie wongerereku wa namba ya aria maronekana na murimu wa Covid-19 niundu wa kwagararwa gwa mawatho maria mavecanitue ma kurua naguo.
Rais niwongererete watho wa mwiyugo kana Curfew na mithenya ingi 60 varia ikambagiriria thaa inya nginya thaa ikumi cia kiroko guku akiuga watho uyu ugatumika nginyagia thini wa kaunti iria cionekanite iri ugwatiri wa murimu uyu. Kaunti ino ni Kisumu, Siaya, Homabay, Migori, Busia, Kakamega, Vihiga, Bungoma, Kisii, Nyamira, Kericho, Bomet na Trans Nzoia.
Micemanio niikanjitue vanduri va mithenya 60 iri vamwe na iria ya giuteti kana ya kambeni.
Mambura ma uviki, ruracio, kugimarania, mathiko na mambura mengi makarumiriria watho wa gukorwa na andu 100 thiini wa ngunguiro ino.
Mbica irutitwe online
Maitha Ngari
