Kirari gikeno kuri aciari a ciana iria iri na mawathe mwena wa Kathunguri wardiri ya Kieni South gicigo kia Embu ya irathiro vuva wa kwamukira utethio kuma kuri gikundi kia andu aria mari na ngaari muthemba wa Mazda, utethio uria maamukire parishiri ya Kathunguri muthenya wa Jumamosi.
Gikundi giki kia Mazda nigitethetie ciana ino na indo ngurani ta irio, nguo, iratu wana mbeca niguo kumavuthavuthiria muturire.
Utethio uyu ukinyirite ciana ino iria aciari ao mathondekire gikundi kia New Neema Self-help group, kuvitukira gikundi kia waragania na thayu gia kanitha gatoreki nikio CJPC.
Agitariria vatiri Justin Muriuki augite CJPC maari na mworoto wa gutethereria andu a mwena ucio kuvitukira kithomo na gutungatira aria arwaru na akuru nwati riria mathiire muvangori wa kurathima mucii nirio meethire ciana ino na gwitikaniria gutethereria ciana ino na njira wa iria mangivota.
Murungamiriri wa gikundi kia Mazda Allan augite nimagutethereria kugurira ciana ino indo iria maravata ta wheel chair gatagatiri ka indo ciingi kana kumava utethio wa gutara aciaria ao.
Akiaria ithenyari ria andu ama, vatiri mwene miceni ya Kathunguri kuria ndeto ya gucutha ciana ino yambiririe niucokeretie ngatho gikundi giki kia Mazda niundu wa utethio wao kuri ciana ino.
Riu aciari aria mari na ciana iria iri na wathe nimauritue gukorwa matakuthitha ciana ciao nwati maciumirie anduri na niketha mavote gutetheka.
-Mbuya Ngari-
