Vururi wa Kenya kirauko kia umunthi niwamukirite dose ngiri 880,460 cia njanjo ya murimu wa COVID 19 ya Moderna kuuma kuri vururiri wa US rungu rwa muvango wa Covax nayo UNICEF igitethereria gukinyia njanjo ino.
Ino niyo njanjo ya mbere iria ikinyite vururiri thiini wa dose million 1.76 iria ivecanite ni vururi wa America na ciivoketwe gukorwe igikinya vururiri.
Njanjo ino ciamukirwe kivarori kia ndege kia Jomo Kenyattta Internatonal Airport ni maavitha kuuma ruvonge rwa ugima wa mwiri ari vamwe na mutethereria wa minista wa ugima wa mwiri dagitari Mercy Mwangangi ,principal secretary Susan Mochache, murungamiriri munene wa kavida dagitari Patrick Omoth na mwenegiti kamitiri ya kurumbuiya njanjo dagitari Willis Akhwale.
Mochache nucokeretie ngatho thirikari ya America nundu wa utethio uyu wa njanjo ya Moderna varia augite njanjo ino nigutethereria vururi wa Kenya thiini wa kuvecana njanjo na gukinyaniria itanya ria raisi Uhuru Kenyatta ria kuvecana njanjo kuri andu million 10 igikinya December mwaka wa 2021.
Wauguo andu nimauritue kwiyumiria kwa wingi aria makinyitie ukuru wa miaka 18 niguo mamundwe njanjo cia Moderna na Astrazeneca iria ivitukitue gutumika.
Mochache augite vururi wa Kenya gukinyagia riu wamukirite dose million 3.6 varia augite akenya matigakorwa magiicagurira njanjo iria makumundwa nwati makamudagwa iria iri kuo .
Nacio thiini wa kaunti ituo cia kuvecana njanjo niikwongererwa kuuma kuri 800 nginyagia 3000.
Mochache wavo ongererete kaunti ya Nairobi niikugia njanjo ino umunthi kivwai kana muthenya wa ruciu
Uthuthuria wa njanjo ino thiini wa gikiro gia kathatu wonanitie njanjo ya Moderna iri na wigiririku wa gicuji kia 94.1 vari igana gia kuririgiria murimu wa Covid 19 angikorwa mundu ndanagwatwa ni murimu uyu ringi nwati wigiririki uyu ukoragwa ukithii nthi na gicuji kia 86.4 kuri andu aria makinyitie ukuru wa miaka 65 kuthii na iguru.
Mbica irutitwe online
Wanja Njiru
