Maavithaa atandatu a vorithi aria meekuiritwe na kuuraga imwana iria igiri kuma Kianjokoma kauntiri ya Embu nimaandikithitie wendekithia igotiri makienda miiri ya imwana ino ithikurue.
Maavitha ama atandatu aria ni Benson Mbuthia, Consolota Kariuki, Nicholas Cheruiyot, Martin Wanyama, Lilian Cherono na James Mwaniki marenda igoti kwathana uthuthuria wa kinyi wikwe mbere ya matwiriritwe undu wa wonthe.
Kuvitukira wakili wao Danstan Omari, maugite riria postmortem yekagwa kuri imwana ino igiri iria ni Benson Njiru na Emmanuel Ndwiga, ataalamu a gwika postmortem aria macaguritwe a aria mathitanganite matiarivo na uguo rivoti iria yavecanirwe nwa ikorwe itari na wigiririki.
Thiini wa guiteterera kwao maugite riria aria magwatitwe matwaritwe gituori kia vorithi imwana ino igiri ciatuvire kuma ngariri na uguo gukua kumana na ndivangio iria maagire.
Maavithaa ama atandatu tayari nimatwaritwe civitari ya Mathare niguo kurorua ugima wao wa kimeciria.
Wavo nimarenda igoti kwathana mavewe thimu ciao niguo mavote gutumira micii yao na mawakili ao mbeca.
Atandatu ama aria makoretwe mavingiritwe gituori kia vorithi gia Capitol Hill niguo gwitikiria uthuthuria kurika, wavo nimarenda marekererue na bail mbere ya uthuthuria urike.
Maavithaa ama mathiite nambere kuvingirwa Capital Hill na ciira uyu ukagwetwa ringi Jumaine mbuku.
Mbica irutitwe online
-Mbuya Ngari-
