Mutongoria wa kiama kia ODM Raila Odinga riu niauritie munini wa rais William Ruto erute giturwari giake angikorwa ndarakenwa ni uria thirikari iratwarithua.
Niathiite na mbere gukuma munini wa rais niundu wa gukorwa akiuga thirikari ndiratwarithua na njira iria yagiririte na ke ai thirikariri iyo na wauguo kuuga mathurirwe vamwe na rais na kwogwo avatii gutethereria rais gukinyaniria maundu maria meririre mwingi.
Mutongoria uyu wa kiama kia odm athiite na mbere kuuga Ruto arakuruvania maundu maria macuku monthe kuri ke na Uhuru namo maundu maria mega akauga nimake maina na rais.
Raila riu niuritie Ruto erute gitiri giake uria Jaramogi Odinga ekire riria onire Rais Jomo Kenyatta ndaramuva wira ai munini wake na kwongerera wanake niwerutire gitiri kia umbunge wa Langata niguo kuthiria ngucanio ciake na uria wai mumbunge wa Saboti Michael Kijana Wamalwa iguru ria utongoria wa kiama kia Ford Kenya.
Kunari uguo, Raila niugite gukorwa ke na Rais Kenyatta nimaramurire gutigana na rivoti ya BBI yatecanirua ni igoti ria gucokia ciira riiko, wamuri wao ndurarigiriria mundu waguonthe kuthii na mbere na ciira uyu igotiri inene vururiri, niguo mwingi uria wamigwataga mbaru ugie kivoto kiao.
Niathiite na mbere kuuga kurugamua kwa rivoti ino ya BBI gugatuma icigo mbunge imwe itecanirwe niundu wa gukorwa itakinyitie mwigana wa andu aria mavitie gukorwa mai gicigo mbungeri kimwe na guku mwingi wa icigo mbunge imwe makivewa mbeca itaramegana nigukorwa mai engi gukira mwigana wa andu aria mavatii gukorwa mai gicigo mbungeri kimwe.
Mbica irutitwe online
Njagi Ndathi
