Akenya nimauritue kugwatirira andu aria mari na mawathe na mametikire maturari niguo matigakorwe makiimena. Ni miario yaritue ni Job Kirembu, umwe wa amemba a kiama kia waragania na thayu (CJPC) kanithari wa gatoreki wa Kathunguri Diocesiri ya Embu.
Miario yake yukite vuva wa Jumamosi nthiru ya tariki 21 mweri uyu wa kanana mwaka wa 2021 aciari kuurua matige kuthitha ciana ciao iria iri na mawathe niguo mavote gutetheka muturireri.
Kunari uguo, andu ama mari mawathe mavinda mengi nimatengagwa ni andu a itura gatagatiri ka mathina mengi na riu nimauritie andu aria maturanitie namo gukorwa matakumatenga.
Niundu kuri na andu matecaga ciana ta ino riria maigia, andu nimauritwe gwitikira kiveo giki kuma kuri Ngai na matungate ciana ino na njira iria yagiririkite. Namo andu aria mari na uvoti na a wendi mwega nimauritue gutethia andu ama mari na mawathe niguo mavote gwiyukiriria.
-Mbuya Ngari-
