Arimu a cukuru cia university nimarungamitie mugomo wao uria urari wambiririe umunthi vururiri mugima.
Mwandiki munene wa kiama kia aruti wira ama kia UASU nike Constantine Wasonga augite marungamitie mugomo wao niguo gwitikiria miaranirio yao na thirikari gwikika.
Augite muungano uyu na kamiti ya kwariria maundu matiganite ma arimu ama nimeetikaniritie gwika uthuthuria wa kuvingua kwa witikanirio wa micara ya ciringi billion 8.8.
Mbeca ino ciari itethie amemba 30,000 a muungano uyu wa UASU, Kenya University Staff Union (Kusu) na Kenya Union of Domestic, Hotels, Educational Institutions, Hospital and Allied Workers (Kudheiha).
Kunari uguo mugomo uyu urungamitue vuva wa mucemanio gatagati ka ciungano ino na mwandiki mukaru wa ruvonge rwa kithomo Simon Nabukwesi.
Kimenyithia kia mugomo uyu kiavecanirwe tariki 23 mweri uyu wa kanana mwakari.
Uthuthuria uria ugwikwa niukorwa ukiroria kana arimu ama nimaigitwe ngathiri iria ciagiririkite kuringana na kithomo kiao na uguo undu uria ukonania kana mararivwa micara iria yagiririkite.
Mbica irutitwe online
-Mbuya Ngari-
