Igoti inene mwena wa Meru niritikanitie na itua ria kiovo kia miaka 15 riria riavecanirue kuri mutwarithia wa boda boda uria wavikitie mutumia uria anyitire kiavinya aina miaka 16.
Njanji Edward Muriithi augite wana thengia ya mutumia uyu kuuga ni mutumia wa Jackson Bundi kavindari gaka ndari na uvoti wa guoca itua riu miaka mugwanja mivituku.
Njanji Muriithi niwongererete ni undu wiina kieva niundu airi aya maina na mwana vamwe na kuovwa gwa Bundi nigucunite mucii uyu uria uratethagiriria kimbeca kana urugamiriri wa mucii uyu guku akiuga watho uvatii kugitira mwana wowonthe kumana na kunyitwa kiavinya.
Thiini wa itua ria gutethereria kurigiriria iviko cia ciana na unyitani kiavinya, njanji Muriithi augite kiviko kiria kiri vo gatagatiri ka airi aya gitigitumika ta uira niundu wa uria uthitangitwe.
Akivecana uira wake mutumia wa Bundi uria wiina miaka 23 niwirite igoti athiire gwa Bundi atakuringirirua na makiambiriria guturania ta mundu na mutumia wake.
Bundi atuirue kiovo kia miaka 15 tariki 23 mweri wa January mwaka muvituku niundu wa kunyitana kiavinya ni mucirithania munene wa Tigania Paul Wechuli.
Bundi agerire ngero ino tariki 5 mweri wa December, mwaka wa 2014, kuria Nkomo location mwena wa Tigania West, kuria kurerikana anyitire mwana wa miaka 15 kiavinya.
Kaari wa Mugendi
Mbica irutitue online
