Raisi Uhuru Kenyatta nuthundurite waki wa Kenya National Referall and Research Hospital, thivitari nene ruvongeri rwa mbiraru na iria itanyitwe kuvecana utungata wa mwanya nvongeri cia ugitiri na kuri mwingi.
Akiaria vindi ya mambura ma kuthundura waki uyu kambiri ya Kabete kauntiri ya Nairobi ,raisi augite waki wa thivitari ino iria igakorwa na itanda 700 na iria iri thiini wa level six ni muvango wa thirikari wa gutigirira ugima wa mwiri nurarumbuwa.
Wauguo raisi augite thivitari ino igakoragwa igitungatira atumia na anduarume aria mararuta wira nvongeri cia ugitiri varia akumitie waki wa thivitari ino ni kwona ino niyo thivitari ya gikiro kia iguru kuthudurua vuva wa thivitari wa Memorial kuthudurua mwaka wa 1970.
Raisi Uhuru akumitie thivitari ino akiuga niigutungatira maavitha a ugitiri aria mekiraga uturo wao ugwatiri makigitira mivaka ya vururi vamwe na ekari na indo ciao.
Eririte nimagukorwa makivingura thivitari ciingi Nairobi iria igutetethia aria mari icagiri ngurani.
Wavo eririte thivitari wa Level four ugakorwa ukivingurwa Kahawa na imwe Isiolo niguo gutungatira maavitha a ugitiri.
Mwenari wake minista wa ugitiri ndagitari Monica Juma augite thivitari ino njeru twa ngumo mbega ikuva raisi Uhuru akithenguta utongoriari nundu wa muradi uyu ,nwati nikureta nginyagia uthiyi wanambere vururiri.
Engi marari mamburari mama ni minista wa ugima wa mwiri, Mutahi Kagwe minista wa ugitiri wa ndari ya vururi, ndagitari Fred Matiang’i,na munene wa ruvonge rwa ugitiri Kenya Defence Forces General Robert Kibochi .
Wanja wa Njiru
Mbica irutitwe online
