Makamishina , ndagitari Dabar Maalim na Rose Macharia a ruvonge rwa kuruwa na ungumania EACC nimatigite wira ,ino ni kuringana na ndumiriri iria ivecanitwe kuma nthingira wa iregi.
Kuvitukira ndumiriri mutambori wa ukinyaniria wa kiriu wa twitter nthingira wa iregi ugite raisi Uhuru Kenyatta niwamukirite marua ma gutiga wira kuma kuri airi acio muthenya wa umunthi nwati mativecanite itumi cia gutiga wira ruvongeri rwa kuruwa na ungumania.
Ndagitari Maalim na Rose Macharia magukumire oviciri January mwaka wa 2016 vamwe na komicina Paul Mwaniki na Sophia Lepuchirit na makivitithua ni uria wari njanji munene Willy Mutunga.
Maalim na Macharia macagurirue iturwari ino mwaka wa 2015 vuva wa kuthurimwa ni kamiti ya kivoto na watho.
Vindi ya kuthurimwa kamiti ino niyaugire nimakenetue ni Maalim nundu ni murumiriri wa dini makimwivoka kureta wigiririki thiini wa ruvonge ruru .
Mwenari wake Macharia vindi ya kuthurumwa niwa kuruvanagua na gukorwa agite wira atumirite maratathi matari ma uuma nwati kamiti iria yamuthurimire igitecaniria nguruvanio ino.
Wanja wa Njiru
Mbica irutitwe online
