Maavitha atandatu a vorithi aria manyitithanitue na ikuu cia anake airi a nyina umwe mwena wa Manyatta Embu nimathitangitwe na ivitia ria kuragana.
Atandatu acio aria ni Benson Mbuthia, Consolata Kariuki, Nicholas Cheruiyot, Martin Wanyama, Lilian Cherono na James Mwaniki mathitangitwe na mavitia mairi ma uragani wa mundu.
Kunari uguo nimareganite na nthitango iyo mbere ya mucirithania wa igoti rinene Daniel Ogembo.
Vau kabere atandatu aya mendekithitie miiri ya anake acio airi ithikurue niguo ikwe ithimi cia kwonania kiumo gia ikuu ciao kana post moterm uceru mbere ya mathitangitwe ivoya riria riaregirwe ni mbari ya nthitango.
Atandatu acio matiari athomere nthitango ciao kuma riria maikirue ngono tariki 17 mweri muthiru na marathiite nambere kuvingirirua stationiri ya vorithi ya Capitol Hill Nairobi metererete utwiria uthirie gwikwa.
Vau kabere, wakiri uria wathuritwe ni thirikari kurugamirira atandatu acio niurerutire cirari ucio vuva wa kumenyekana ati atandatu acio nimecariritie mawakiri engi a kumarugamirira.
Kunari uguo, mbari ya nthitango niivoete igoti ritikirie ana ao na aria ni andu arume mavingirirue njerari ya Industrial Area nao aria engi airi aria ni atumia matwarwe njerari ya atumia ya Langáta magieterera ivoya riri ringikua igotiri.
Mau makithiicaga na mbere wakiri Danstan Omari augite matiri na thina na kuria atandatu acio makuvingirua nwati avoya igoti kurekereria maavitha aya atandatu na bondi wa mundu.
Riu igoti niritikirite kuthikiriria ivoya ria kurekererua na mbundi kwa atandatu aya tariki 22 mweri uyu wa kenda. Nitukuthii na mbere gukumenyithia maria makeyumiria megii cira uyu.
-Muriithi Triple M
-Mbica irutitwe online
