Ekuirwa airi aria maretucaga ndagitari na aria maracanjaga mwingi njanjo cia maveni cia murimu wa covid-19 muthemba wa Johnson & Johnson riu nimagwikara njera mithenya 5 makiria.
Mucirithania munene wa igoti ria Milimani Synkian Tobiko augite ekuirwa ama aria maramenyeka ta Wallace Mugendi na Kenneth Mukundi mavingirwe gituori kia vorithi kia Kasarani mithenya iyo 5. Itua riri riukite vuva wa mwena wa nthitango kuvoya kavinda ka mithenya itano niuguo makorwe marikia uthuthuria wao.
Ekuirwa ama mekirwe ngono muthenya wa aramici civitariri ya Crane varavarari ya Lumumba Drive Kasarani kauntiri ya Nairobi kuria macanjagira mwingi njanjo cia maveni na kumarivia 3,000 vari njanjo imwe.
Uthuthuria uronania ekuirwa ama mavecanite njanjo ino gatagatiri ka mweri wa mugwanja na mweri wa kanana mwaka uyu.
Muthuthuria wa ruvonge rwa uthuthuria wa wikinai gicigo gia Kasarani Corporal Kapario Lekakeny augite nimaamukire mateta kuma kuri makiria ma andu 10 aria mamukirite njanjo ino cia maveni guku makirivira 3,000 mugaru na uria thirikari yugite njanjo ino ni cia mana.
Tariki 30 mweri muthiru, ruvonge rwa ugima wa mwiri ni rwarutire mukana kuri civitari na mandagitari aria maravecana njanjo ituori iria itavitukitue ni thirikari, makiuga giiko giki nikiraiga uturo wa akenya ugwatiri tondu ituo icio itikinyitie ikiro cia kwiiga na kuvecana njanjo ino.
Ekuirwa ama marevokwa gugakinyua igotiri tariki 14 mweri uyu vuva wa uthuthuria kuthira.
Mbica irutitwe online
Njagi Ndathi
