Vururi wa Kenya timwandikithiu ikuo wa cionthe kana gukorwa na ndeto cia kumata kwa nthakame kumana na njanjo iria ithiite nambere kuvecanwa cia murimu wa covid-19.
Ino ni miario yaritue umunthi ni uria ugwatiririte gwa kavinda giturwa kia murungamiriri munene wa ruvonge rwa ugima wa mwiri ndagitari Patrick Amoth varia augite kuri na maundu moonekanite vuva wa andu amwe kuvewa njanjo ino, maria ni ta guturwa ni kiongo, ururu, minoga gatagatiri ka maundu mengi nwati gutiri na mathina manene maandikithitue.
Amoth augite thirikari niikirite mitaratara ya gutigirira njanjo cionthe niirakinyaniria gikiro kia muungano wa ugima wa mwingi nthi ng’ima WHO mbere ya kuvecanwa kuri andu.
Wavo niutecaniritie miario iria irauga vururi uyu wamukirite njanjo igucuka na kavinda kanini varia augite njanjo cionthe iria ikinyite guku iri na makiria ma uturo wa mieri ithatu mbere ya icukite.
Gukinyagia riu vururi wa Kenya wamukirite njanjo dosi 5,147,030 varia dosi 2,519,400 iria ivecanitwe kuma nja ya vururi uyu ta utethio ni cia AstraZeneca, 1,760,780 ni cia Moderna, 725,250 ni cia AstraZeneca cia kugura nacio 141,600 ni cia Johnson & Johnson.
Gukinyagia riu dosi 2,934,285 nicio ivecanitwe guku vururiri varia dosi 2,117,075 ni iria ciacanjanirwe iri cia mbere nacio cia kairi ni dosi 817,210.
Mbica irutitwe online
-Mbuya Ngari-
