Makiria ma arutwa 4,000 aria ni athaki kuma gitaruri kia Africa nimagakorwa magicemania Nairobi mwaka muku wa 2022 niundu wa mechi cia FASU iria ni Federation of African Sports Universities, mechi iria irekika rita ria ikumi.
Mechi ino iria ciavangitwe gwikika mwaka muthiru wa 2020 na kurungamua niundu wa mututhuko wa covid-19 riu ciirikite igekika kuma tariki 6 nginya 10 mweri wa gatandatu mwaka muku wa 2022.
Marua cia kugwata ugeni university cionthe gitaruri kia Africa ivecanitwe umunthi vuva wa gwikirwa kirore ni Prof. Godfrey uria ni munini wa Vice-Chancellor cukururi wa Kenyatta University, Nomsa Mahlangu uria ni rais wa FASU, Mbabu Murithi uria ni rais wa Kenya Universities Sports Association niyo KUSA na Prof. Paul Kuria Wainaina uria ni Vice-Chancellor wa Kenyatta University kuria mechi ino igekikira.
Mechi ino ciikikaga rita rimwe vari miaka iri varia ciambiririe mwaka wa 1974 vururiri wa Ghana, mwaka wa 1978 ciekika vururiri wa Kenya, Nigeria – 2004 vuva wa wagi wa thayu gitaruri kia Africa kumariri, South Africa – 2006, Uganda – 2008, Namibia – 2012, Kenya-2014, South Africa 2016 na Ethiopia 2018.
Mechi ino igatumirwa gucagura timu cia atumia na anduarume iria ikarungamirira gitaru kia Africa thiini wa mechi cia FISU University World Cup Soccer iria igekika mwaka wa 2023 kuria vururiri wa China mwena wa Jinjiang.
Mbica irutitwe online
-Mbuya Ngari-
