Thirikari ya kaunti ya Kirinyaga niyongererete icigo cia kuvecanirue njanjo niundu wa murimu wa Covid-19, undu uyu ukite mbere ya mambura ma Mashujaa Day maria matanyitue gwikikira kauntiri ino.
Kuringana na murugamiriri munene wa ugima wa mwiri, ndagitari George Karoki, augite icigo ino ciongererekete kuuma 9 nginyagia 22 niguo mwingi uvote gukinyira njanjo nginyagia maturari.
Ndagitari Karoki akiaria na andiki a movoro ari Thiba Dispensary niuvecanite mukana kuri mwingi wa kaunti ino gukorwa makiamukira njanjo kuuma icigo iria itatengetwe niundu wa muvango uyu guku akiuga iria itengetwe nicio ciina wagiriru wa kuvecana njanjo ii vamwe na aruti wira aria mavetwe mathomo megii uvecani wa njanjo.
Wauguo ndagitari Karoki niwongererete na kuuga njanjo cionthe iria iravecanwa nwaginyagia ikamukirwa na gwikirwa thiini wa mutaratara wigii uvecani wa njanjo na uria urugamirirtue ni ruvonge rwa ugima wa mwiri thiini wa kaunti ino ni kuringana na mwerekera uria umite ruvongeri rwa ugima wa mwiri guku vururiri.
Ndagitari Karoki niutariritie icigo iria itengetwe niundu wa uvecani wa njanjo irarumiriria mutaratara uria umanite na ruvonge rwa ugima wa mwiri undumwe na ruria rurugamirite ugima wa mwiri nthi ngima.
Guku akiuga thirikari ya kaunti iina uvoti wa kuvecana njanjo ino varia augite vaina vata wa gukorwa kwiina mutaratara mukinyaniru wa gutigirira ekari a Kirinyaga nimagitirua.
Kaunti ino ya Kirinyaga nirikitie kuamukira njanjo ciingi ngiri 12,000 cia Astra Zeneca na ngiri 8,000 cia Moderna varia augite itanyitue thiini wa icigo cia uvecani wa njanjo. Mwingi niuritue kwiyumiria na wiingi thiini wa icigo iria iri vakuvi naao niguo mavote kwigita na kuvotwa ni murimu uyu kana gukua manyitwa ni virus ino.
Kaari wa Mugendi
Mbica irutitue online
