Mateta nimandikithitue igotiri makiregana na kuvirithua nambere kwa mutaratara uyu muceru wa kithomo wa CBC uria urongoreretie kuthengutia kithomo kia 8-4-4.
Kuvitukira rais wa kiama kia mawakili Kenya Nelson Havi, uria ukinyitie mateta mama nike wakili Esther Awour Adero augite itua ria ruvonge rwa kithomo rwa kwambiriria curriculum ino njeru ni mugaru na watho na ni ugwati kuri uturo wa mithenya yukite wa ciana cia Kenya na ivatie kurungamua.
Adero arenda CBC ino yambe irungamue nginya riria ciira uyu ukathikirirua na gutuuwa varia ongererete kurungamua kwa yo gukarigiriria kwagararwa kwa ivoto cia ciana cia kithomo.
Thiini wa affidavit, Havi augite kuri na mateta vururiri mugima niundu wa uria CBC ino irathugurirwe gutari na muvango mukinyaniru wa mawatho maria marumagirirwa ma kithomo kia mbere na kia vata.
Augite kurega kwaraniria na gwitikaniria na anyiti itemi a kithomo thiini wa curriculum ino njeru, arutwa maracukumwa gucagura kiria magatuika tene mbere ya magite na kithomo kiambere na kiria ni kia vata giakumavotithia gucagura mundu arenda gugatwika ndwi akura.
Wavo mateta mengi ni ati CBC ino niigiririte murigo murito wa mbeca niundu wa kugura mavuku mengi ma kosi itiganite na indo ciingi nyingi iria iravatarika cukuru.
Aria riu mathithangitwe cirari ino ni minister wa Basic Education, Kenya Institute of Curriculum Development (KICD), kanju ya kurungamirira igeranio cia kivururi Kenya, commission ya kwandika arimu TSC, kiama kia arimu kia KNUT, mbunge ya vururi, Dr. Fred Matiang’i na Prof. George Magoha.
Mbica irutitwe online
-Mbuya Ngari-
