Kanitha cia evangelico niinyitite mbaru mukana uria uvecanitwe wa kurigiriria ateti gwikinyia mathabahuri. Kuringana na ndumiriri iria mavecanite muthenya wa umunthi mukana uyu uria wagirirwe kurumirua gutari na guta ngeci nugukorwa ugitigirira nyomba cia mavoya ni irakorwa na utheru uria wagiririkite.
Itua riri riukite vuva wa mucemanio wa Evangelical Alliance of Kenya kana EAK uria wikikite muthenya wa igoro varia kanitha ino ciugite kavidari gaka kithurano kiri vakuvi gwikika nyomba cia mavoya na magongona ma mathiko makoretwe magitumirua muno ni ateti kwariria kampeni ciao.
Thiini wa ndumiriri iria EAK mavecanite kuri atongoria a kanitha cia evangelico niati vari na vata ya gutigirira nyomba cia mavoya ni ntheru nwati ti gucitua nyomba cia kwaririria uteti.
Wauguo ndumiriri ino yugite mutongoria wa giuteti ekinyia kanithari rita ria mbere akavecagwa gitio na gukarivithua nwati ndagatonyerere mutarata wa igongana riria rirathii nambere.
Maunduri megiie kwamukira utethio kuumana na ateti EAK maugite kiveo kana maruta maria makavecanwa kanithari magakoragwa makirumbuuwa kuringana na mandiko, kiria kiri njarari ya umotho gitikamenye kiria njara ya urio yavecana .
Riu kanitha wa Evangelico unyitanirite na kanitha wa Anglican vamwe na kanitha gotoreki aria marigiriritie ateti mathabauri .
Wanja wa Njiru
Mbica irutitwe online
