Mwikuirwa umwe niarauragirwe guku engi 10 magikua ngono ni maavitha a vorithi riria maratharikire ngari cia vorithi makigeria kuvonokia anyanya ao aria maraikitue ngono muthenya wa igoro.
Ngari ino cia vorithi iraumagaritie lorry imwe iria iramatitwe na mivuko 400 ya sukari ino irekuirwa gukorwa itakinyaniritie ikiro cia gutumika.
Kurerikana maavitha aya a vorithi kuma ruvonge rwa DCI vamwe na ruria rwa CIPU aria marutaga mwira ruvonge rwa ungania ma magoti maraumite gituori kia vorithi kia Chwele mathiite Kisumu riria maratharikirwe ni ekuirwa aya aria maravingite njira na ngari makiria ma 20 na vikiviki tauniri ya Makunga shopping centre.
Avitha umwe wa vorithi niaragire nguraro njuku kithuri na mbaru mbere ya vorithi iria irathiite Chwele guka na gutethereria gicanjamari giki na mavota gwikia ekuirwa amwe ngono.Maavitha a vorithi nimaravotire kugwata ngari igiri na vikiviki imwe iria iratumagirwa ni ekuirwa aya na ciavirwa gituori kia vorithi kia Kakamega.
Ekuirwa aria maraikirwe ngono ni vamwe na Evans Ariko (22), Geoffrey Ikasalion (28), Dan Oure (23), Thomas Ekisa (24), Isaac Etyang (21), Sammy Oloo (22), David Otieno (27), Simon Ogema (24), Kelvin Kasala (21) na Winnie Muriuki (22).
Wauguo vorithi nimaravotire kugwata matharaita maria maratumagirwa ni ekuirwa aya.
Riu ikuirwa mai gituori kia vorithi kia Kakamega meterere gukinywa igotiri.
Mbica irutitwe online
Njagi Ndathi
