Mutumia umwe niwikinyitie igotiri akiedekithia mwiri wa mwana wake uria magite na wakili wi gatu Harrisson Kinyanjui kuthikurua .
Mutumia uyu uria uramenyekana ta Tabby Rose Wanja akuruvanitie wakili Kinyanjui nagukorwa eingiritie thiini wa uvoyi wa ngoma.
Kuringana na ndumiriri iria yandikithitue Wanja etikitie Kinyanjui akoretwe agitavania magongona ma ungoma .
Riu edekithitie mwiri wa kana gaka gake ga kamwiritu kuthikurua na gwikirua kithimi na etikirue kuthika mwana wake mugundari wake vari augite etikitie gikuo kiu giacangirirwe ni maundu mengi .
Wavo augite mwana uyu akuire na njira kiriga tariki 14 mweri wa ikumi mwaka wa 2017 ari thivitari wa MP SHAH, wauguo akiorota wakili Kinyanjui nundu wa kurega kurumbuiya ugima wa mwiri wa mwana uyu vindi iria agite thiina wa ngoro mbere ya gikuo giake .
Thiini wa nthitango iria andikithitie igotiri wavo Wanja augite mbere ya mwana uyu akuite niwakoretwe na wirugari mwingi na akigeria kwariria wakili uyu niguo mavire mwana thivitari nwati akirega na nivo muthenya uria warumirire avirire mwana uyu thivitari na agikua .
Akiongerera Kinyanjui niwakorirwe agicejia varia metikaniritie mathike mwana ucio kavuriri cia Langata.
Kunari uguo kuthikurua kwa mwiri uyu nukureganitwe nakuo ni tata wa mwana uyu varia augite nyina wa mwana ucio ndavikitue ni Kinyanjui .
Wanja wa Njiru
Mbica irutitwe online
