Kuthikirirua gwa ciira ya gikuo kia uria wari ngavana wa kathatu wa kaunti ya Nyeri Wahome Gakuru nigucokereria umunthi aramici vuva wa watho uyu kuvecanwa ni munene wa ruvonge rwa uthuthuria wa wikinai George Kinoti.
Wahome akuirire mutinori wa varavara mwaka wa 2017 vuva wa gukorwa oviciri ino ya ngavana vandu va mithenya 77.
Aria mevoketwe kuvecana uira wao ni vamwe na muruti wira wa Safaricom, maavithaa a vorithi aria maikinyirie varia mutino uyu wekikire na avithaa wa uthuthuria uria urarungamirira ciira ino Edward Nyabuto.
Wavo mwena wa nthitango niuritie muruti wira umwe wa kambuni ya DT Dobie kuma vururiri wa Germany gwikinyia igotiri. Kambuni ino ithondekaga ngaari muthemba wa Mercedes Benz, uria niguo muthemba uria Wahome atumagira kavinda karia mutino uyu wekikire.
Mwandikwa uyu wa kambuni ino arevokwa kuvecana ripoti ya uria ngaari ino yavana na thina wayo vuva wa mutino gwikika.
Aira engi meevoketwe gukinya igotiri ni ngavana wa Nyeri Mutahi Kahiga, mumbunge wa Mathira Rigathi Gachagua, mwandiki wa kaunti ya Nyeri Benjamin Gachichio na munene wa aruti wira Paul Wambugu.
Ngavana Wahome akuire tariki 7 mweri wa 11 mwaka wa 2017 riria ngaari yatere mwerekera na gukuna mikong’iri. Ngaari ino yari na andu ana aria ni ngavana uyu, mutethereria wake Albert Gakuru, murangiri wake Ahmed Abdi na ndereva wake Samson Kinyanjui.
Mbica irutitwe online
-Mbuya Ngari-
