Maavitha a uthuthuria wa wikinai nimeekitie ngono andu athatu aria ni atumia airi na mundumurume umwe magikuruvanua na gwitua kugwata mundu mugwate. Athatu ama marekirue ngono igoro kivwai.
Kuringana na ripoti ya maavithaa a vorithi, Jumaa nthiru ya tariki 17 mweri uyu wa Kenda, mutumia umwe uria ni mwongia wene na ritwa Jane Wairimu atorokire na munyanyawe wa kando Joseph Mogire na matiga muthuri wake nike Brian Mutuku ari na kieva na ari mutukanire.
Utuku wa ucio Mutuku akiamukira thimu varia etagua ciringi 200,000 niguo mutumia wake arekererue na nivo andikithirie ripoti na DCI Embakasi.
Niundu wa gucukumwa na kuvewa mikana, Mutuku niwacuthire ciringi 17,000 na atumira uria wamuvuragira na vuvari magwatana na andu a mucii mathondeka Whatsapp group niguo gucutha mbeca ino cietagua.
Muthenya wa Jumatato ya kiumia giki matuma ciringi 40,000 na nivo airi ama mathingatirwe na kumenyeka marutire mbeca ino Mtito-a-Ndei.
Kunari uguo, mbere ya airi ama kugwatwa ni maavitha a vorithi, mundu wa kathatu uria ni munyanya wa Mogire uria riu maari na Wairimu, ambiriria kwaria nake akienda kumenya niki atarathii kumucerera uria maavanganite.
Munyanya uyu wa Mogire ni murutwa wa university ya JKUAT wa miaka 21. Vuva wa mwari uyu kuthinia Mogire nivo mathiire na Wairimu cukuru ino ya JKUAT kuria mwena wa Juja kuria mwiritu etikire gutonya muthakori uyu na makiambiriria gwikara kwa mwiritu uyu mari athatu.
Athatu ama maragwatirwe igoro mari mwena wa Sagana varia Wairimu augite araigwatite mugwate niguo kugia mbeca cia kuriva thiiri iria agite vuva wa kuvutwa wira. Riu mavingiritwe gituori kia vorithi kia Embakasi metererete gukinyua igotiri Jumaa ino.
Mbica irutitwe online
-Mbuya Ngari-
