Spika wa mbunge ya kivururi Justin Muturi niaregete wendikithia wa kungana na mutongoria wa kiama ODM nike Raila Odinga kithuranori giukite kia mwaka wa 2022.
Akiaria vuva wa riendikithia ria murugamiriri wa ward ya Nairobi West Ngare Otieno, muturi augite Raila ni umwe wa aria maravinga itanya riake ria kuvuranira giturua kia munene wa vururi undu umucungiririte gikua wigiririku wake.
Senator wa Embu Njeru Ndwiga niatarite ateti na mwingi makorwe magitacukia makinyo ma giuteti na uugi na matigirire nimaiga thayu vindi ya kithurano kia mwaka wa 2022.
Nikiririte urito maundu ma ugima wa mwiiri guku akiuga mwingi uvatii gukorwa ukiamukira ugima wa mwiiri wa gikiiro kia iguru.
Njeru niathiite na mbere kuuga bill iria ikuo ya kauwa ivatie gukorwa icenjetue na ni kieva kuona ati mbunge kwiina bill igiri cia kauwa itavitukitue.
Mwenari wake mumbunge wa Manyatta John Muchiri niakumitie spika Muturi niundu wa kwiyumiria kuvuranira giturwa kia munene wa vururi guku akiuria atongoria mauke na mawendikithia maria magatigirira arimi nimaratetheka na urimi wao.
Mumbunge wa gicigo mbunge kia Mbeere ya iguru Muriuki Njagagua niakumite ambunge niundu wa gukira riria mwingi uria wamathurire uranyamara niundu wa kwambatirira kwa ngarama ya muturire kumana na kwambatirira kwa thogora wa maguta.
Niathiite na mbere kuuga mutaratara muceru wa kithomo wa CBC timwagiriru na nimatarite uria wari minister wa kithomo Amina Mohammed arute nwati agecejua mbere ya aucenjitie.
Gavana wa Nairobi Ann Kananu Mwenda niaurite andu a gicigo kia Mt Kenya magwatane vamwe na auria atongoria kugwata Muturi mbaru niguo gukiriria gicigo giki.
Umwe wa arugamiriri a ward marari na Kananu Morris Otieno Ngare niauritie Muturi kugwatanira na mutongoria wa kiama kia ODM Raila Odinga.
Atongoria aya mararagia riria marari harambiri kanithari wa ACK Kibugu, gicigo mbungeri kia Manyatta countiri ya Embu muthenya wa igoro.
Amwe a atongoria aria marari harambiri ino ni vamwe na gavana wa Nairobi Ann Kananu, senator wa Embu Njeru Ndwiga,mumbunge wa Manyatta John Muchiri na engi engi.
Mbica irutitwe online
Njagi Ndathi
