Makiria ma njajo millioni ithatu nio ivecanitwe vururi. Ministry ya ugima wa mwiri yugite kuri njajo millioni ithatu , ngiri magana mugwaja ma mirongo itandatu na imwe , magana manana ma mirongo mugwaja na ithathatu njajo million ingiri , ngiri magana manana ma mirongo itano na ithathatu , magana kenda ma mirongo mugwaja na ingiri ivecanitwe iri dose ya mbere nayo njajo ngiri magana kenda ma inya , magana kenda ma inya ikivecanwa iri dose ya kairi .
Wamukirua wa njajo ya kairi kuri aria mavetwe njajo ni gicuji kia 31.7 vari igana . ino yukite vuva wa andu magana mairi ma mirongo itandatu kuonekana na murimu wa covid 19 rungu rwa mathaa mirongo iiri na manna mavituku.
Namba ya umunthi yumite kuma kuri ithimi ngiri ithathatu , magana mairi ma mirongo iiri na ithathatu iria ciikitwe na gukinyia gicuji kia aruaru a murimu wa covid 19 kiri 4.2 vari igana.
Kuma kuri namba ya umunthi akenya ni 256 ,4 maumite nja ya vururi, uria munini muno ni mwana wa mwaka umwe nake uria mukuru muno aina ukuru wa miaka 99.Namba ya aria monekanite na murimu wa covid 19 ikinyite ngiri magana mairi ma mirongo inna,magana manna ma mirongo ithatu na anna nacio ithimi iria ciikitwe igikinya millioni ingiri , ngiri magana matano ma mirongo itano na ithathatu , magana mairi ma mirongo iiri na ingiri .
Thiini wa kuanti iria ciandikithitie aruaru kaunti ya Nairobi niyo itongoretie na aruaru 63Kajiado 19, Kitui 16, Kiambu 15, Nakuru 13, Uasin Gishu 11, Meru 11, Wajir 11, Bungoma 8, Garissa 6, Mombasa 6 na Homa Bay 5 guku kaunti ya Embu ikiandikithia aruaru anna.
Muthenya wa umunthi aria mavorete murimu wa covid 19 ni 109 varia 78 mararoragirirua kuma miciiri yao nao 31 makirekererua kuma mathibitari matiganite vururi na gukinyia namba ya aria mavorete vururi iri ngiri magana mairi ma mirongo inna na umwe , magana matano ma mirongo iiri. .
Kunariuguo andu anna nimatoretue ni murimu wa covid 19 muthenya wa umunthi na gukwa na gukinyia namba ya aria makwite kumana na murimu wa covid 19 vururi iri ngiri ithano , igana rimwe ria mirongo iiri na athatu.
Mbica irutitwe online
Mwende Jackie
