Arigitani kauntiri ya Embu nimakaite ni ikiro cia civitari kauntiri ino na makiria civitari ya Embu level 5.
Makiaria na andiki a movoro civitariri ya Embu level 5, maavitha a ngwataniro cia arigitani maugite arwaru makoragwa makithinika muno niundu wa gutura kwa indo cia vata niguo kurigitwa.
Matongoretue ni mwenegiti wa kiama kia arigitani a gikiro kia nurses Joseph Ngwasi maugite arwaru maranyua manjani gutari iria.
Ngwasi wavo niugute civitari ino itiri na ndawa na arigitani nimanogete kwira arwaru mathii civitari cia andu kiumbe na kuthii kugura ndawa ndukari cia ndawa cia andu kiumbe.
Maugite matirona vata wa wonthe wa kuthii na mbere kwiga arwaru civitariri ino wamakithinikaga.
Arigitani ama maugite mavangite mugomo wao ukambiriria Jumatatu nginya riria thirikari ya kaunti ya Embu ikavingia mateta mao.
Augite mbeca iria itinagua micarari yao itivecanitwe kuria ivatie kuvewa undu utumite aruti wira ama gukorwa makithinika.
Miario ya Ngwasi niigwatitwe mbaru ni Aloyius Njoka uria uritie thirikari ya kaunti ya Embu gukorwa magioca makinyo maria magiririkite niguo kuvonokia ruvua rwa ugima wa mwiri kauntiri ino.
Wavo Njoka niurorota atongoria aria mathurirwe na amemba a mbunge ya kaunti ino ya Embu niundu wa kwiganirira maguru na gukira riria civitari cia Embu iri ugwatiri.
Mwenari wake Felix Fundi augite mbunge ya kaunti ino niyanyiviria budget ya civitari ya Embu level 5 kuma million 234 nginya million 80 ndeto iria itumite mootungata civitariri ino kugumirwa ni thina. Augite ni undu utagiririkite ovici ya ngavana gutengerwa ciringi million 180 riria ekari kauntiri ino marathinika.
Mbica irutitwe online
-Mbuya Ngari-
