Mwingi wa Kenya niuvuthiritue murigo vanini wa muturire varia thogora wa maguta ugwite vuva ya ruvonge rwa kuramata thogora wa maguta guku vururiri Energy and Petroleum Regulatory Authority (EPRA) kuanirira undu uyu.
Thogora wa maguta ma petrol na diesel utanyitue kugwaa na ciringi ithano namo maguta ma taa makigwaa na ciringi 7.28 igikinya thaa thita cia utuku wa umunthi.
Kugwaa gwa thogora wa maguta kumanite na muvango wa kugeria kuramata thogora wa maguta. Kugwaa kwa thogora wa maguta mama uthiite mugaru na thogora wa maguta maria marikitie kuingira guku vururiri varia petrol yongererekete na gicunji kia 1.71 namo ma diesel makiongerereka na 3.1 vari igana.
Undu uyu urevokwa kunyiviria andu ngarama ya muturire iria yambatire na gikiro kia 6.91 vari igana mweri muvituku vuva ya thogora wa maguta kuambata na njira nene thiini wa history ya vururi uyu.
Matuku maukite thogora wa maguta wavota kunyiva makiria kurumirira mendekithia maria mavecanitue ni kamiti ya kigina na mivango ya kivururi ii vamwe na gutinua gwa goti uria wekiriritue maguta undumwe na indo cia maguta na petroleum development levy na nuthu.
Angikorwa makavitukua gugakorwa na maguta ma thogora ya nthi gatagati ga ciringi 7 na 11 vari lita nwati mendekithia mama maceru nwaginyagia mambe mamurikwe ni mbunge na mavitukue ni rais Uhuru Kenyatta.
Kaari wa Mugendi
Mbica irutitue online
