Umwe wa ekuirwa athatu aria makuruvanitue na kuraga vatiri Michael Kyengo Maingi niwitikirite mbere ya igoti inene ria Embu gukorwa agerire ngero ino.
Michael Muthinji amakirie igoti varia acenjerie meciria na kuuga niwagerire ngero ino mbere ya njanji Lucy Njuguna.
Muthinji vamwe na Kavivya Mwangangi na Solomon Mutava, mathitangitue na kugera ngero ino utuku wa tariki 8 mweri wa ikumi kuria mwena wa Makima.
Kurumirira gucenjia gwa meciria gwa Muthinji igoti nirirugamire gwa kavinda niguo kugia na miario gatagati ga mutongoria wa nthitango cia mwingi na wakiri wa Muthinji nike Karimi Guantai.
Vuva ya gucokereria gwa igoti mwena wa nthitango cia mwingi niukorirue wiina kavinda karito magitariria ndeto cigii ciira uyu varia mawakiri ma Muthinji mareganiire na ndeto iria ikuvecangwa na nivo njanji Njuguna auririe Mati kwivanga na gutariria maundu uria kwagiririte.
Ciira uyu ukathikirirua ringi tariki 21 mweriri varia kwiina kavinda ga gucarania na uuma ciirari uyu undumwe na gukorwa na mwerekera wigii ekuirwa acio engi airi.
Kaari wa Mugendi
Mbica irutitue online
