Arangiri athatu a cukuru wa sekondari wa eritu wa Komothai nimaikitwe ngono vuva wa kuuragwa kwa murutwa wa form four kuuma cukuru wa sekondari wa anake wa Gathiruini uria watharikirwe vuva wake kwonekana cukururi uyu wa eritu.
Athatu aya maikitue ngono vuva wa maavitha a uthuthuria kuuma Kiambu kuvunga arutwa mavuri maunduri megie gicanjama giki.
Maavitha a uthuthuria nwamathiite nambere na gucarania na arutwa engi atano aria mavotire gutoroka vuva wa umwe wao kunyitikana riria matonyete na njira ya nthitho cukururi ucio.
Kuringana na munene wa uthuthuria wa wiki nai George Kinoti, murutwa uria watharikirwe vamwe na engi atano matorokire cukuru muthenya wa Aramici mathaa ma tha ikumi cia kiroko na gutonya nyombari cia kumama cia eritu a cukuru wa Komothai.
Eritu aya nimambiririe kuuga mbu noguo arangiri, arimu na arutwa engi magiuka gwitika mbu ino. Murutwa umwe gatagati ka anake atandatu aria matonyete cukuru uyu wa eritu nike wanyitikanire varia atharikirwe na gutigwa na ndivangio iria ciacangirire gikuo giake akiamukira urigiti.
Wanja wa Njiru
Mbica irutitwe online
