Umunthi uri muthenya wa thuguri maturari, tuguceretie iturari ria Ngaari wardiri ya Mbeti ya iveti gicigo mbunge kia Mbeere ya iveti kauntiri ya Embu niguo kumenya kiumo kia ritwa riri Ngaari.
Akiereithia umwe wa athuri aria akuru na ritwa Mugo wa Ngari wa Ngondi augite kavinda kau ga tene miti mithemba ya migaa niyo yameraga guku undu watumaga kugie na ngaa nyingi. Kunari uguo migaa ino niyathirire nwati ritwa niriavangire.
Andu a Ngaari kavinda kau mari agwimi aria magwimaga nyamu cia kithaka iria ciaukaga kuria ngaa, nimaroraga uki niundu migaa yakoragwa na maroo ma kuguciriria njuki na wavo mari arimi a gamba nwati riu marimaga miraa.
Wanagukorwa ugaruruku nwa uthiite nambere, mathina matituraga varia Sicily Nginya augite aciari a guku nwa kieva mari nakio niundu itura riri riu ritwikite ria guta ciana ciao na njovi na mikei undu uria uramaima thayu wa ngoro. Niuritie atongoria vamwe na aciari kugwatanira vamwe niguo gutigirira gutiri mwana ukarega cukuru niundu wa njovi kana miraa.
Kuringana na Rosaline Mwaniki, mathina mengi maria ekari a itura riri maravitukira ni gucuka kwa varavara ya Kombo Munyiri iria nwayo itigitwe ikimatethie niundu niikuitwe ni manji na gucukangua ni marori ma gukua muthanga.
Ekari ama nwamathiite nambere gukaira Mca wao Murithi Kiura na uria wicikene muno ta Tadpole, makimuria kumarutira varavara iria nguvi ya kumakinyia ramiri na iria ikamaguna makiria. Varavara ino ni ya kumatwikania kuvitukira Maisha Kamili kuthii Gachuriri, ino ni kuringana na Njeru Urito mwikari wa Ngaari.
Riu MCA Tadpole niwiririte ekari ama a Ngaari varavara ino ya Maisha Kamili kuumirira Gachuriri ikaambiriria kuthondekwa mweri uyu muku wa ikumi na imwe nayo varavara ya Kombo munyiri niigwicirirua wike.
-Mbuya Ngari-
