Muthikavu wa diocese ya Embu, Paul Kariuki Njiru niuratongoririe igongona ria mitha kanithari ya Our Lady of Mt Carmel, Njakairi muthenya wegoro agitethererua ni vatiri uria urugamiririte kithomo diocesiri ino ya Embu, Victor Mbogo. Mitha ino irambiririe thaa inya cia kiroko kigwanjari gia kanitha uyu.
Akivunjiria akristiano, muthikavu Kariuki niuramaririkanirie vata wa gukorwa mari na rwendo na wirutiri thiini wa murandi uria uri mbere yaao wa gwaka nyomba ingi njeru ya kugocera Ngai.
Muthikavu niurataririe uvoro wigii wendo wa Ngai kuri andu ake atari na muthutukanio akiuga vaina vata wa aria onthe metanitue na Ngai kurumirira kionereria giake kia rwendo .
Wauguo niurauririe andu kwithema na rumena na kunyita itemi wa mundu vari aria gutigirira mwaki wa rwendo niwatamba kundu kuonthe nthi.
Vuva wa igongona ria mitha, kurari na gitina gia kairi gia gucangithia mbeca niundu wa murandi uyu wa gwaka kanitha ingi njeru na varia kurari na ageni engi marekinyitie ii vamwe na MCA wa Gaturi South, Kamwigunyi na aruiri engi a iti itiganite cia giuteti thiini wa kaunti ino ya Embu.
–Kaari wa Mugendi