Komiconi ya kivururi ya kuruira ivoto cia umundu nimaugite mtugo wa gukuruvania mundu ni murogi gutumira mata na uria ukoretwe ukithii nambere mwena wa Kisii ni muvituke ni mavinda na mugaru na watho.
Akiaria na andiki a movoro mwandiki, murugamiriri munene wa komiconi ino Bernard Mogesa augite atumia na makiria aria athini na aria akuru makuithitie athuri nimakoretwe makivutukira kavinda karito ga kuvivua magikuruvanua na ciiko cia urogi.
Akiuga thirikari igekira mitaratara iria yagiririte gutigirira wa mundu niwavota gukenera ugitiri mukinyaniru. Akiongorera gutiri na mundu uvatarite gukua agikuruvanua na maundu maria macuku ta urogi na uria ni murito kuvecana uira igotiri.
Mogesa augite thiini wa gicunji kia 40 katibari ya Kenya, wa mundu nietikiritue kugia na utonga ari mundu kiumbe kana magwatanirite na thiini wa gicigo wa kionthe guku vururiri. Wauguo gicunji kia 60 gigitikiria mundu wonthe kugia na mugunda na ugitiri.
Mogesa agikanyiriria vata wa andu kuthomithua maundu megii ivoto cia umundu niguo matigane na mtugo uyu wa kumurika atumia aria akuru na athini.
Atumia aana nimarathikua umunthi iturari ria Mokona, mwena wa Marani kaunti ya Kisii varia mauragirue tariki 17 mweri muvituku magikuruvanua na kuraga murutwa wa kirathi kia Form Four.
Komiconi ino nirathondeka rivoti iria ikarekererua vanduri va mweri umwe muku. Wauguo ikavecana mawoni maao kuri andu 14 aria mathurirue ni gavana wa Kisii, James Ongwae kiumia kimwe kivituku.
