Komiconi ya kivururi ya kuramata uruti wira wa maavithaa a vorithi niyandikite atarani niguo mavote gutethereria maavithaa a vorithi guku vururiri.
Atarani aya 59 magatumwa thiini wa station 47 cia vorithi niguo mavote gutethereria maavithaa a vorithi aria arwaru na maratura na wathe.
Akiaria vindi ya uthunduri wa mutaratara wa kuramata ugima wa mwiri wa maavithaa a vorithi kauntiri ya Machakos, munini wa mwenegiti wa komiconi ino, ndagitari Alice Otwala augite maavithaa magatetheka kumana na board ya mwanya iria ikarumbuyagia mathina ma kimeciria maria maavithaa a vorithi maravitukira urutiri wira waao na gwata makiria mivakari.
Ndagitari Otwala augite komiconi ino igatethereria maavithaa aria mathiite nambere kurigitwa mirimu ya kimeciria gucokereria wirari makinyitwa mbaru ni andu a mucii.
Kamicina wa County ya Machakos John Ondego augite tiga muvango uyu wa kumurika mathina ma kimeciria, maavithaa a vorithi nimavatii gutugwa niguo magie na ngoro ya gutungata waro na wauguo kumenyerera aria mararutithania wira naao na magiite ngurario mari wirari.
Komiconi ino ikoretwe ikimurika maavithaa a vorithi kauntiri cia Meru na Machakos mbere ya kuthii mwena wa ithuiro wa vururi uyu.
-Mbica irutitwe online
-Mwende Jackie
