Vururi wa Uganda umunthi Jumatatu niuvingurite macukuru vakuvi miaka iri kuma thirikari yathana macukuru mavingwe vuva wa gututhuka gwa covid-19 vururiri ucio mweri wa kathatu mwaka wa 2020.
Ruvonge rwa kithomo vururiri wa Uganda rugite cukuru ikavingurwa na itina niguo kwithema na mwicuro wa ngari muciiri munene wa Uganda niguo Kampala.
Kuringana na rivoti cia nyomba cia movoro, minister wa kithomo vururiri ucio Janet Museveni augite arutwa onthe marathii kirathi kiu kingi gutari gwika igeranio.
Athiite nambere kuga thiini wa term ya mbere, gugakorwa na mathomo ma mwanya kana tuition niguo kuthomo mathomo ma vata muno ma kirathi kiu mavitukithitue.
Thirikari ya Uganda ndivecanite namba ya arutwa aria mavatie gukorwa kirathiri kimwe nwati kunari uguo, thiini wa cukuru cia mucingi arutwa aria mari na ukuru wa miaka itandatu kuthii iguru nimo mavaterue kwambiriria mathomo mao.
Term ya mbere irambiriria tariki 10 mweri uyu wa mbere nginya tariki 15 mweri wa kana, mavuruke ciumia ithatu, term ya kairi yambiririe tariki 9 mweri wa gatano nginya tariki 19 mweri wa kanana nayo term ya kathatu ikiambiriria tariki 5 mweri wa kenda nginya tariki 9 mweri wa December varia arutwa makathii kavinda ga kuvuruka ga ciumia mugwanja nginya tariki 29 mweri wa mbere mwaka wa 2023.
-Mbuya Ngari-
Mbica irutitwe online
