Thirikari niitumite maavitha a uthuthuria wa wikinai kuthuthuria ndeto ciigie miiri iria ikoretwe ikirutwa muvurori wa Yala mwena wa Gem kauntiri ya Siaya.
Mwaria wa ruvonge rwa maavitha a vorithi Bruno Shioso thiini wa ndumiriri umunthi Jumatano, augite timu ya mwanya wavo niitumitwe kuvika uthuthuria uyu na gutethereria kumenyekana kwa miiri ino, iria imwe ikoretwe iri mocariri ya civitari ya Yala Level 4 vari mieri mingi.
Shioso augite cira cia miiri 19 kurutwa muvurori uyu niciandikithitue thiini wa miaka iri mithiru, wanathengia ya ekari a mwena ucio kuga makiria ma miiri 30 niyo irutitwe muvurori ucio mwaka muthiru.
Muthenya wa Jumatatu, aruiri a ivoto cia andu nimonanirie guoya ati miiri ino nwa gukorwa ni ya andu aria mauragitwe ni andu mari iturwari itiganite.
-Mbuya Ngari-
Mbica irutitwe online
