BBI ni mugaru na katiba, ino ni kuringana na igoti rinene ria Supreme wamuri uria rivecanite umunthi.
Aria maragwata mbaru BBI riu nimagite na ivura rinene vuva wa manjanji mugwanja aria marathuritwe, kuuga wendi wa gwika ugaruruku thiini wa katiba ya Kenya nduarumirira mitaratara iria yagiririkite na uguo ni mugaru na katiba.
Akivecana wamuri wa igoti riri njanji munene vururiri Martha Koome, augite rais Uhuru nike wambiririe bill ino ndeto iria ni mugaru na watho niundu katiba ndimwitikiritie kwambiriria ugaruruku wa katiba.
Wavo wamuri uyu uugite mwingi wa Kenya ndwanavewa kanya keganu ga kuvecana mawoni mao thiini wa mutaratara wa kairi wa BBI.
Kunari uguo, rais Uhuru Kenyatta kana mundu wa wonthe ugwatiririte ovici ya rais ndangithitagwa niundu wa undu uria wikitwe kana utekitwe rungu rwa katiba ya Kenya riria ari wathaniri.
Akithii nambere, Koome augite komiconi ya kuramata mivaka na ithurano IEBC ndianavewa kanya ga kuroriria mitaratara iria yarumirirwe kana yari mikinyaniru nwati kunari uguo IEBC yari na namba mbiganu ya makomicona aria maroririe wigiririki wa irore iria cionganitue niguo kuvitukia BBI.
Manjanji aria mavecanite wamuri uyu ni njanji munene Martha Koome, munini wake Philomena Mwilu, njanji William Ouko, njanji Isaac Lenaola, njanji Smokin Wanjala, njanji Mohamed Ibrahim na njanji Njoki Ndung’u.
-Mbuya Ngari-
Mbica irutitwe online
