Komiconi ya kuramata mivaka na ithurano IEBC niigite na ivura rinene itanyari riao ria kurigiriria utumiri mwingi wa mbeca ni ciama cia giuteti na andu aria maravuranira iturwa itiganite, vuva wa igoti rinene kurega gwika moogaruruku mawathori ma utumiri wa mbeca kavinda ga kambini.
Thiini wa wamuri uyu uria uravingurire mirango ya gutumirwa kwa mbeca uria kiama kana mundu araigua, igoti muthenya wa igoro niriraregire gutecaniria itua ria mbunge ya vururi ria kuuga watho uria wacavithirue ni IEBC mwaka muthiru wa kithimi kia mbeca iria ivatie gutumika kambiniri ni mugaru na watho.
Komiconi ino ya IEBC yambiriritie moogaruruku mama niguo gutigirira ateti nimavewa kanya keganene ga gwika kambini ciao wa undumwe na kurigiriria maundu ta ma kuvaka ekia a kura.
Thiini wa moogaruruku mama, IEBC yaugite avuraniri a giturwa kia urais mativatie gutumira makiria ma ciringi billion 4.4 namo avuraniri a iturwa cia ngavana, senata na murungamiriri wa atumia makirika gutumira mbeca gatagatiri ka million 21.9 nginya million 117.3.
Kunari uguo mbunge ya vururi niyareganire na watho uyu mwaka muthiru mweri wa kenda makiuga kimenyithia giki ni mugaru na watho niundu giacavithirue gitavitukitue ni mbunge ta uria watho uvatarite na mawoni ma mwingi matiocanua, ndeto iria iragwatirwe mbaru ni igoti rinene.
-Mbuya Ngari-
Mbica irutitwe online
