Gikundi kia ataaramu kuuma gicigo kia Ikamba nimauritie mutongoria wa kiama kia Wiper, Kalonzo Musyoka kumurika waringi itua riake kuuma muuganori wa Azimio la Umoja One Kenya coalition na kuvuranira giturwa kia urais ari mundu kiumbe thiini wa kithurano kinene giukite.
Ataaramu aya aria ni vamwe na uria wari mwenegiti wa komiconi ya kurua na ungumania guku vururiri Mumo Matemu, mutaaramu maunduri megii ithurano Koki Muli na uria urugamiririte kanju ya arigitani ya Kenya Medical Practitioners and Dentists Council (KMPDC) Daniel Yumbya, nimaugite mavataro ma ruriri rwa Ikamba nwamakinyanirue waro muuganori uyu wa Azimio.
Kuringana na ataaramu aya muugano uyu wa Azimio na uria utongoretue ni uria uravuranira giturwa kia urais Raila Odinga, wiina mweke munene wa kuandikithia uvotani kithuranori kia mweri wa kanana mwakari.
Wauguo nimauritie Kalonzo guoca giturwa kiria averwe ni Raila na gicunji kiria kigairitue gicigo giki thiini wa thirikari angikorwa Azimio igacinda guku akivariria kuvuranira giturwa giki kia urais mwaka wa 2027.
Kavindari wakau gikundi gia atongoria a kanitha nimauritie Kalonzo gucoka muuganori wa Azimio na kunyita mbaru Raila itanyari riake ria gutuika rais.
Kalonzo araumire guku vururiri egoro erekerete kuria Ngeretha icerari ria kiumia kimwe guku miario ya kumucokia muuganori wa Azimio ikithii nambere itongoretwe ni Rais Uhuru Kenyatta na mwenegiti wa kiama gia KANU, Gideon Moi.
Kaari wa Mugendi
Mbica irutitue online