Akristu a parish itiganite diocesiri ya Embu na makiria parish ya Iriamurai na Nguviu nimarakunguire mitha ya kiririkano gia uturo wa mutigairi vatiri Peter Primieri uria wetirwe ni Mwathani njumaa ya tariki 13 mweri uyu wa gatano ari Trieste vururiri wa Italy.
Igongona riri rirekikire igoro njumaviri parishiri ya Iriamurai rigitongorua ni muthikavu Paul Kariuki Njiru.
Akivunjia muthikavu Kariuki niuraririkanirie akristu, Ngai ni wa ntha nyingi na uguo wa mundu amutungatira airutaniritie Ngai ndakamutiganiria.
Mwenari wake moderator wa parish ya Iriamurai Peter Kariuki niuritie akristu gukovia ciiko mbaro cia vatiri Peter Primieri.
Vatiri John Muriithi Itumbi nake niugite wa mundu avatie gutura na njira iria yagiririkite, akivingagia wendi wa Ngai wa ta uria vatiri Peter ekaga.
Mavatiri na masister namo nimauritue kwambiriria utambia wa kirira kuma nyombari ciao kuvitukira guturania na rwendo na kugwatanira na njira iria yagiririkite, mwito umite kuri vatiri Agapio Kamau.
Igongona riri rirekinyitue ni mavatiri makiria ma mirongo iri, masister na akristu kuma miena ngurani ya diocese ino.
Vatiri Peter Primieri aciarirwe mwaka wa 1940 na gutwika vatiri mwaka wa 1965. Atungatiri diocesiri ya Embu nginya mwaka wa 2019 vandu va miaka 52. Arakuire ari na ukuru wa miaka 82.
-Mbuya Ngari-
