Mwenegiti wa komiconi ya kuramata mivaka na ithurano IEBC, Wafula Chebukati, niuritie avuraniri ana a giturwa kia urais gugaikinyia mucemaniori muthenya wa Njumatano kiumia giuku.
Avuraniri ama aria ni William Ruto wa mungano wa Kenya Kwanza, Raila Odinga wa Azimio la umoja One Kenya, George Wajackoyah wa kiama kia Roots na Waihiga Mwaure wa kiama kia Agano, magacemania na Chebukati niguo kwaraniria maunduri ngurani.
Mamwe ma maundu maria makaaririrua ni register iria icavithitue ya ekia a kura, maundu megie maumirira ma kithurano, kambini ciao, gatagatiri ka maundu mengi.
Chebukati augite ituo 46,232 cia gwikiria kura niciandikithitue niundu wa kithurano kia mwaka uyu wa 2022, namo ekia a kura aria mayandikithitie ni million 22.1.
-Mbuya Ngari-
Mbica irutitwe online
