Kurari na gicanjama hoteliri ya Windsor muciiri wa Nairobi kuria komiconi ya kuramata ithurano na mivaka iracemanitie na avuraniri a giturwa kia urais kithuranori kinene giukite. Mundumurume umwe niuretire thagathaga riria mucemanio uyu ukugendaga nambere.
Mundumurume uyu uria uramenyekana ta Julius Kamau akuanirue ni maavithaa a ugitiri na kuthengutua mucemaniori uyu.
Ndeto makiria ikiuga arekinyitie mucemaniori uyu niguo avecane riendekithia riake kuri avuraniri aya a giturwa kia urais ria gukorwa matakururungana matauniri na vanduri va uguo kuthii igotiri angikorwa nimakaregana na maumirira ma kithurano giki.
Aria marari mucemaniori uyu riria gicanjama giki kiumire ni Raila Odinga, George Wajackoyah na Waihiga Mwaure.
Kamau akuanirue ni maavithaa a ugitiri a avuraniri aya a urais.
Muvuraniri wa giturwa giki kia urais na muugano wa Kenya Kwanza, William Samoei Ruto akinyire ithaa rimwe vuva ya gicanjama giki kuonekana.
Guku gukirikana ti riita riambere Kamau anyitikanite akiregana na maundu thiini wa mambura ma mwingi na maria ma andu kiumbe. Wauguo niwonekanite kengi thiini wa mirurungano iria ikikite tauniri ya Nairobi.
Ria muthia onekanire akireta thagathaga kuria Bomas of Kenya riria IEBC yacemanagia waringi na avuraniri a giturwa kia urais mbere ya kuamura aana aya niyo magiririte kuvuranira giturwa giki.
Kaari wa Mugendi
Mbica irutitue Online
