Guoya niugumirite ekari mwena wa Ntulili gicigori mbunge gia Tigania ya ithuiro muvakari wa kaunti ya Meru na Isiolo vuva wa arithi a ngamira mari na matharaita kuthithuka mwena ucio kurithia indo ciao cia nthakame migundari na miciiri ya andu.
Ekari mwena uyu maugite arithi ama aria makinyire muthenya wa Njumaine, nimatumite kugie na wagagu niundu makinyire na kurathukia micinga rierari kumakia mundu wa wonthe ungienda kumarigiriria kurithia kuu.
Makiaria mari kanithari wa Zayun, ekari ama vamwe na MCA muthure wa wardi ya Athwana Jim Muchui maugite arithi ama nimagararite watho uria wavecanirwe ni mbunge ya kaunti ya Meru wa kumarigiriria kurithia kauntiri ya Meru.
Riu nimauritie ngavana Kawira Mwangaza gutigirira watho uyu wavitukirue ni mbunge ya Meru niwarumirirwa niguo macokwe ni thayu.
-Mbuya Ngari-
Mbica irutitwe online
