Maavitha a vorithi kuma gituori kia vorithi gia Kiritiri mwena wa Mbeere ya iveti kauntiri ya Embu nimavingirite mundumurume mwikuirwa wa wiyii wa kiavinya na nimaracarania na ekuirwa engi airi aria matorokire vuva wa maavitha a vorithi gwitika kiriro gia ekari a matura ma Karie na Kabuguri mathaari wa utuku wa kuramukira umunthi Njumaine.
Komanda wa vorithi wa kaunti nini ya Mbeere ya iveti Inviolata Lumati niugite maavitha a vorithi marathire matairi ma ngari muthenya wa Toyota Probox vuva wa ekuirwa ama kurega kwivecana kuri maavitha ama ta uria maramurithitue.
Lumati augite airi ama matorokire magitiga ndereva uria wikirue ngono na uria uratethereria maavitha a vorithi gwika uthuthuria.
Niwongererete na kuuga maavitha a vorithi marekuira athatu ama na andu engi aria makathithurua nimo makoretwe makinyamaria avuri mbiacara Mbeere ya iveti vari mweri umwe muvituku.
Senata wa Embu Alexander Mundigi niugite wikinai niwingivite mwena ucio na uguo kuuria timu ya ugitiri ya kaunti kumatia ugitiri.
Mundigi auritie minista wa ugitiri wa ndari ya vururi Kithure Kindiki gutwara maavitha a vorithi locationiri cionthe akiuga gwika uguo gukamatia ugitiri maturari maria matigitwe ugwatiri niundu wa uraca wa kuria ituo cia vorithi iri.
Ekari a Karie, Kathera na Kabuguri wardiri ya Mavuria nimakaite ni wongerereku wa wikinai na nimauritie thirikari kugwatirira atongoria a nyumaba kumi niguo gutethereria kuvecana ndumiriri wa cionthe cia wikinai.
-Mbuya Ngari-
Mbica irutitwe online
