Ngavana wa Embu Cecily Mutitu Mbarire niugite mbeca iria itarivitwe kuri andu aria maavetwe kandarathi kauntiri ino miaka mivituku makarivwa angikorwa wira niwarutirwe na nimarumirire mutaratara uria uvatie. Urivi wa mbeca ino uri budgetiri iria iravitukirue igoro ni maMCA.
Wavo niugite thirikari yake ikarutira wira ekari onthe kauntiri ino gutari kuthutukania na uguo gutecaniria miario iria ikoretwe ikiuga kuri na icigo iratengerwe mbeca nini gukira iria ciingi.
Ngavana Mbarire augite mirandi imwe iria eranire igakorwa ikiambiriria kuma mweri wa gatandatu na kuria ndeto cia gucukia itigithanwe nacio.
Ngavana Mbarire aritie uu umunthi indi ya kwambiriria uruti wa wira wa kaunti ino mwaka uyu muceru wa 2023, wira uria wambiriritie na gikaro kia mavoya na ucokia wa ngatho kuri Ngai.
-Mbuya Ngari-
