Munini wa rais, Rigathi Gachagua niuthuritie muugaukano uria urari kuo gatagatiri ga atongoria mbungeri ya kaunti ya Kericho kurumirira mbukaniriro iria yaumire niundu wa utongoria wa mbunge ino.
Ino yukite vuva ya mbukaniriro kuonekana mbungeri ino varia mbica ya video yonanirie arugamiriri a wadi makirua na gucungira Rais William Ruto kuvecana mukana kuri atongoria acio.
Iturwa iria ciaretire mbukaniriro ni iria cia mutongoria wa aria engi, munini wake, muvuri mucarica wa aria engi na munini wake.
Akiaria na andiki a movoro muthenya wa umunthi, Gachagua niugite miario iria arari nayo na atongoria aya a kaunti ino nirikitie kugia na kivonia.
Murugamiriri wa wadi ya Kamasian Philip Rono nike mutongoria wa aria engi, Phancy Chepkorir ni munini wake, Aaron Rotich nike muvuri mucarica wa aria engi na Bavina Serem ai munini wake.
Gachagua akiongorera riria kwagia na mathina mitaratara ya kiama nivatii kuramatwa kuthiria ngucanio nwati ti gwicambia ta uria gwekikire kauntiri iyo ya Kericho.
Wauguo Gachagua niugite kiumia giuku agakorwa ari mbungeri ya kaunti ya Meru gucaria kivonia kia thina uria ukoretwe wikuo.
Kaari wa Mugendi
Mbica irutitue online
