Igongona ria mathiko ria ngina wa vatiri uria urugamiririte kithomo diocesiri ya Embu, Victor Mbogo nike Anna Muthanje Mbui nirikikite kanithari ya St Paul’s Kevote ritongoretue ni muthikavu wa diocese ya embu, Paul Kariuki Njiru varia auritie akristu kuthii nambere kunyitiria witikia waao na mitigate mwivoko thiini wa Ngai.
Muthikavu Kariuki niuritie andu gukorwa mari na ngoro ya kwenda gutethia andu matagucererwa.
Mutigairi Anna Muthanje Mbui, niuririkanitue na njira itiganite ni andu. Mwari wake niugite niwendete muno maundu ma kanitha na niwamathomithirie kuvoyaga ruthiaro na kugendaga kanithari.
Tucucu na tucuku twake nitumukumutie niundu wa gukorwa ari kionereria kiega.
Akiaria vanduri va mavatiri, mwenegiti waao vatiri Josphat Waweru, mwene miceni kuria Kyeni niugite Anna arari mutumia mutana.
Wauguo niucokeretie ngatho aria magite na kavinda ga kumiriria mucii uyu kavindari gaka karito.
Anna Muthanje Mbui aciarirwe mwaka wa 1940 na agikua tariki 13, mweri wa januari mwaka uyu wa 2023. Mwathani niave Anna kivuruko gitathiraga na utheri wa vindi cionthe niumutheragie. Kuuma muromori wa iriviro urute Mwathani muoyo wake, Aravuruka uvoro, ni gutuike guo.
Kaari wa Mugendi
