Mwiri wa mundumurume uria wavorokere runjiri rwa Nyamindi iturari ria Ngucui, kaunti ya Kirinyaga muthenya wa aramici niurikitie kurutwa ni ethambiri a andu kiumbe undumwe na andu engi aria marerutirite kuuma gicigo giki.
Kelvin Muthomi uria urarutaga wira hoteliri imwe kuria Kimbimbi gicigo mbunge kia Mwea athiite runjiri ruru gukunguira muthenya wake wa guciarwa ari na munyanyawe na murata wake riria atendurukire na akigwaa runjiri ruru.
Akiaria vuva ya mwiri wa Muthomi kurutwa runjiri ruru, ithe wake, Duncan Mutuma, na uria umite kaunti ya Meru, augite niuvavukite niundu wa gikuo giki kia muvici varia arekinyirie varia mutino uyu wonekanire.
Kuringana na Mutuma, aumagaranitie na arata na andu a mucii, augite ethambiri aya maratumire mathaa mengi muthenya wegoro magicarania na mwiri wa muvici uria uronekaniire thaa imwe na nuthu cia utuku.
Akiongorera muvici na munyanyawe maraina na mivango ya kuvikania varia athiite runjiri ruru gukunguira miaka 24 ya guciarwa gwake.
Ethambiri kuuma gicigo giki matongoretwe ni Dunson Murango,makiuga marari na kavinda karito gucarania na mwiri wa Muthomi nwati maraumiririe niundu wa andu a mucii wa mwanake uyu.
Nimathiite nambere gutariria mwiri wa Muthomi urakwamite rungu rwa mathiga namo manji marari na nvevo nyiingi.
Mwiri wa Muthomi niurikitie kuvirwa mocari ya Kibugi ugieterera post-mortem.
Kaari wa Mugendi
Mbica irutitue online
