Vava Mutheru Francis muthenya wa umunthi niugucemania na andu aria magumirue ni mbara vururiri wa South Sudan, uyu ni muthenya umwe vuva ya kuvecana ndumaniriri kuri atongoria a vururi gwikirira uramati wa thayu niundu wa andu a vururi ucio na aria magiikite kavinda karaca.
Vava Mutheru Francis ari icerari riake riambere vururiri ucio kuuma riria wagire wiathi kuuma kuri Sudan mwaka wa 2011. Vuva ya kugia na wiathi vururi ucio niwagire na mbukaniriro njuku cia kinduriri na iria ciacangire vururi uci kugaukana.
Andu matanyivirite ngiri Magana 380 nimakuire vanduri va miaka itano vindi ya mbara na iria yathirire mwaka wa 2018 na atongoria aria mari na ngucanio makiathana nginyagia umunthi.
Vava Mutheru uria wiina miaka 86 arevokwa kwariria gikundi kia andu a South Sudan aria maratura nja ya kambi kuria Juba na aria macukumirue gutorokera mbara iria yarikuo.
Wauguo akariria andu muciiri munene wa South Sudan. Kivwai kia umunthi Vava Mutheru agakorwa na mavoya na muthikavu wa Canterbury na Moderator of the General Assembly of the Church of Scotland, aria mari nake icerari riri.
Engi matanyitue gucemania na Vava Mutheru ni atongoria a dini aria marutaga wira na andu aria athini, atiganirie na aria matiitue muno vururiri ucio wikiririte witikia maina gicunji kia 60 vari igana kuuma kuri andu milioni 12 mari akristu.
Kaari wa Mugendi
Mbica irutitue online
