Mwaki niucukitie nyaki ya kwenderia arithi a ng’ombe na indo cia mwigana wa mbeca itanyivirite 400,000 iturari ria Mutithi unit 4 kaunti nini ya Mwea West kauntiri ya Kirinyaga.
Mary Njeri uria uyonerete mutino uyu augite mwaki uyu urambiririe igoro Njumaine kivwai thaa ikumi na igiri nwati niundu wa gutura kwa manji, ekari marari na kavinda karito ga kuvoria mwaki ucio.
Riu vorithi a gituo gia Kiandegwa nimaambiriritie uthuthuria kumenya kiria kiracungire mwaki ucio.
Mwaki uyu uvotire kuvorua viu umunthi Njumatano kiroko thaa igiri vuva wa ngwataniro ya ekari na avoria a mwaki kuma kauntiri ya Kirinyaga, ino ni kuringana na Peter Gichangi mwikari guku.
Agikira ndeto ino kirore, civu wa Wamumu, Godfrey Mithamo, augite avoria a mwaki kuma kaunti ino ya Kirinyaga marakinyire igoro utuku thaa imwe na nuthu, maumite Kiangai gicigo mbunge kia Ndia kuvoria mwaki wingi.
Ekari nimauritie thirikari ya kaunti gutigirira wa wardi iri na gituo gia kurumbuiya ugwati wa mwaki riria waumira.
-Mbuya Ngari-
Mbica irutitwe online
