Muvaka wa mavururi ma Kenya na Somalia ukarugurua waringi na itina kuuma muthenya wa umunthi vanduri va mithenya 90 yukite.
Minista wa ugitiri wa ndari ya vururi, Prof Kithure Kindiki augite muvaka wa Mandera kuthie Bulahawa ukarugurua vanduri va mithenya 30.
Gicigo gia kairi kia muvaka ucio na kiria ni kia Liboi-Harahar-Dobley mwena wa Somalia gikarugurua mithenya 60 yukite kuuma umunthi.
Wauguo Kindiki niugite gicigo kia Kiunga-Ras Kamboni kuria Lamu gikarugurua kiri kia muthia iri mithenya 90 kuuma muthenya wa umunthi.
Guku akiongorera thirikari niraroria uvotekeku wa kuongerera gicigo kingi gia kana muvakari ucio mwena wa Somalia maumite na guku vururiri kaunti ya Wajir.
Kindiki niaragia vuva ya mucemanio na murunawe wa Somalia, Mohamed Ahmed Sheikh Ali, minista wa ugitiri, Abdulkadir Mohamed Nur na uria wa maundu ma nja ya vururi, Abshir Omar Jama.
Mucemanio uyu wa maminista wa kuramata gwataniro maunduri megii muvaka ucio wa Kenya na Somalia urekinyitue ni minista wa ugitiri guku vururiri, Aden Duale na maavithaa engi a ngathi yeguru thirikariri.
Kaari wa Mugendi
Mbica irutitue online